Sunday, September 26, 2021
घरTrendingजनकपुरमा हिन्दू सम्मेलन

जनकपुरमा हिन्दू सम्मेलन

धनुषा : विश्व हिन्दू महासङ्घको आयोजनामा जनकपुरमा प्रदेशस्तरीय विराट सन्त सम्मेलन आइतबार सम्पन्न भएको छ । सम्मेलनबाट हिन्दू धर्म त्याग्न विवश गर्ने र गराउने विरुद्ध कडा प्रतिकार गर्ने र नेपाललाई हिन्दू राज्य घोषणाका लागि आन्दोलनको तयारी थाल्ने निर्णय गरिएको विश्व हिन्दू युवा परिषद्का प्रवक्ता मिथुन साहले बताए।

सम्मेलनले धर्मान्तर, छुवाछूत तथा हेपाहा प्रवृत्तिदेखि लभ जेहाद (प्रेम विवाह) सम्मका विषयमा छलफल गरी यस्तो निर्णय गरेको हो । सम्मेलनमा धनुषा, सिरहा, महोत्तरी, सर्लाही, बारा, पर्सा, रौतहट र सप्तरीलगायत प्रदेश नं २ का आठवटै जिल्लाबाट पाँच हजारभन्दा बढी साधुसन्तको सहभागिता रहेको थियो ।

विश्व हिन्दू परिषद्का महासचिव जीतेन्द्र सिंहले समाजमा जातपातका कारण छुवाछूतको अन्त्यको लागिसमेत गम्भीर भएर लाग्नुपर्ने जनाएका छन् । समाजमा बढ्दो विकृतिसँगै धर्म र अध्यात्मप्रतिको आस्था कमजोर भएकै कारण लभ जेहादजस्ता विसङ्गति मौलाएकाले सबै साधुसन्त, महन्त र समाजका अनुयायी एक भएर अघि बढ्नुपर्ने डा श्यामसुन्दर शास्त्रीले बताएका छन् ।

सम्मेलनमा जनकपुरधाम उपमहानगरपालिकाका प्रमुख लालकिशोर साहले हिन्दू धर्मको रक्षाका लागि आफू सचेत र गम्भीर रहेको भन्दै जनकपुरधामलाई मासु र मदिरामुक्त घोषणा गर्ने तयारी भइरहेको बताए ।

महोत्तरीस्थित मठिहानीका रामजानकी मठका मानमहन्त जगन्नाथ दास वैष्णवको अध्यक्षतामा भएको विराट सन्त सम्मेलनमा भारतबाट विश्व हिन्दू परिषद्का अन्तर्राष्ट्रिय सन्तमार्ग दर्शकमण्डलका सदस्य डा श्यामसुन्दर शास्त्री, परिषद्का अध्यक्ष टीका पहाडी, राष्ट्रिय अध्यक्ष सत्यम मुरारी, उपाध्यक्ष उद्धव घिमिरे, काशिन्द्र यादव, अमन गुप्तालगायत सहभागी थिए ।

RELATED ARTICLES

एक उत्तर छोड्न

कृपया आफ्नो टिप्पणी प्रविष्ट गर्नुहोस्!
कृपया आफ्नो नाम यहाँ प्रविष्ट गर्नुहोस्

- Advertisment -
Nepal Lawyer

Most Popular

Recent Comments