Wednesday, June 16, 2021
घरसमाचारठेकेदारले काममा ढिलासुस्ती गरेपछि पेश्की फिर्ता गर्ने प्रक्रिया सुरु

ठेकेदारले काममा ढिलासुस्ती गरेपछि पेश्की फिर्ता गर्ने प्रक्रिया सुरु

म्याग्दी । जिल्ला अस्पताल, बेनीको भवन निर्माणको ठेक्का पाएको निर्माण कम्पनीको पेश्की फिर्ता गर्ने प्रक्रिया सुरु भएको छ। निर्माणको ठेक्का पाएको महादेव–खिम्ती–ज्वाला–रफीना जेभीले काममा ढिलासुस्ती गरेपछि शहरी विकास तथा भवन निर्माण डिभिजन कार्यालय बागलुङले बैंक जमानतबाट असुल हुने गरी पेश्की फिर्ताका लागि प्रक्रिया अघि बढाएको छ। कम्पनीले बेनी अस्पतालको ५० शय्या क्षमताको भवन निर्माणको जिम्मा पाएको थियो। पेश्की लगे पनि कार्ययोजना र लक्ष्यअनुसार काम गर्न नसकेपछि ६६ लाख रुपैयाँ असुल गराउन जमानत बसेको बैंकलाई पत्राचार गरिएको कार्यालयका लेखा अधिकृत मीनबहादुर बानियाँले बताए।

२०७३ मंसिर २१ गते १८ करोड ८४ लाख रुपैयाँमा ठेक्का सम्झौता भएको थियो। ‘निर्माण कम्पनीले हालसम्म ५ प्रतिशत पनि काम गरेको छैन,’ डिभिजन कार्यालयका इन्जिनियर गणेश महर्जनले भने। ४ हजार ९ सय ६३ वर्गमिटर क्षेत्रफलमा २०७६ मंसिर २० गतेभित्र चारतले भवन निर्माण गर्नेगरी सम्झौता भएको थियो। १८ महिनाको अवधिमा डिपिसी र पिल्लर ठड्याउने कामसमेत सकिएको छैन। गत फागुनदेखि कम्पनीका कर्मचारी सम्पर्कबिहीन छन्।

‘पटक–पटक काम गर्न अनुरोध गरेपनि अटेर गरेकाले कारबाही प्रक्रिया अघि बढाएका हौँ,’ इन्जिनियर महर्जनले भने। भवन निर्माणमा ढिलाइ हुँदा सेवाप्रवाहमा असर परेको बेनी अस्पतालका प्रमुख वरिष्ठ चिकित्सक डा रोशन न्यौपानेले बताए। चिकित्सक आवास भवन निर्माण भने अन्तिम चरणमा पुगेको छ। हाललाई अस्थायी भवन निर्माण गरी बिरामीलाई सेवा दिने व्यवस्था मिलाइएको छ। पन्ध्र शय्याको उक्त अस्पताललाई विस्तार गरी २०७२ सालमा पचास शय्यामा स्तरोन्नति गरिएको हो।

RELATED ARTICLES

एक उत्तर छोड्न

कृपया आफ्नो टिप्पणी प्रविष्ट गर्नुहोस्!
कृपया आफ्नो नाम यहाँ प्रविष्ट गर्नुहोस्

Most Popular

Recent Comments